नेकपा (एमाले) का महासचिव शंकर पोख्रेलले गणतन्त्र जनसम्प्रभुताको शासन व्यवस्था भएकोले यसलाई कमजोर बनाउने सबै प्रकारका अराजकता आफूहरुलाई अस्विकार्य रहेको बताएका छन् ।

पोख्रेलले संघीयता र समावेशीतालाई नेपाली समाजको मौलिक विशेषता अनि लोकतन्त्र बलिदानीपूर्ण संघर्षले स्थापित गरेको गौरवपूर्ण जीवन पद्धती भनेका छन् । उनले प्रतिगमन घृणायोग्य रहेको पनि टिप्पणी गरेका छन् । एमालेले आगामी मंसिर ७ गते काठमाडौंमा गर्न लागेको जागरण सभामा सहभागिताको लागि अपिल गर्ने क्रममा उनले यस्तो बताएका हुन् ।

उनले अहिले देशमा विद्यमान सबै समस्याको समाधान संघीय लोकतान्त्रिक गणतन्त्रभित्रै सम्भव रहेको दाबी गरेका छन् । उनले कुनै प्रकारको अधिनायकवाद, पपुलिज्म र अराजकता समस्याको समाधान नभएको र हुन नसक्ने पनि ठोकुवा गरेका छन् । पोख्रेलले फेशबुकमा लेखेका छन्-

गणतन्त्र जनसम्प्रभुताको शासन व्यवस्था हो,
संघियता र समावेशीता नेपाली समाजको मौलिक विशेषता हो,
लोकतन्त्र बलिदानीपूर्ण संघर्षले स्थापित गरेको गौरवपूर्ण जीवन पद्धती हो ।
संघिय लोकतान्त्रिक गणतन्त्रलाई कमजोर बनाउने सबै प्रकारका अराजकता हामीलाई अस्विकार्य छ ।
प्रतिगमन घृणायोग्य छ । राजनीतिक अस्थिरता हाम्रो समाजको विकास र समृद्धिको वाधक बनेको छ ।
आउनुहोस् सुशासन, विकास र समृद्धिका लागि
संवैधानिक,कानूनी र संरचनागत सुधारको माध्यमवाट राजनीतिक स्थायित्वको आधार निर्माण गर्ने संकल्प यात्रामा सहभागी बनौ ।
आजका सबै समस्याको समाधान संघिय लोकतान्त्रिक गणतन्त्र भित्रै सम्भव छ ।
कुनै प्रकारको अधिनायकवाद, पपुलिज्म र अराजकता समस्याको समाधान होइन र हुन सक्तैन ।
त्यसैले
मंसिर ७ गते काठमाडौंमा हुने जागरण सभामा सहभागी बनौ ।
निरासा चिर्दै आशा जगाउने संकल्प र सन्देश सुनौ, हुदै गरेका राम्रा कामका वारेमा र भविष्यको योजनाका वारेमा जानकारी प्राप्त गरौ ।
राष्ट्र र जनताको हितका पक्षमा सकारात्मक सन्देश प्रवाह गरौ ।